သမ္မာကျမ်းစာ ထဲ ခရီးသွားခြင်း (၁၈) | ယေရှုခရစ်တော်ကို ဖွားမြင်ခဲ့ရာ ဗက်လင်မြို့ (ဗက်သလေဟမ်မြို့)

ခရစ္စမတ်ကာလ ရောက်လာတော့ ကျွန်တော် ရောက်ခဲ့ဘူးတဲ့ ခရစ်တော် ယေရှု မွေးဖွားခဲ့ရာ ဗက်သလေဟမ်မြို့ (Bethlehem) လေး ကို သတိရသွားပါတယ်။ ပါလက်စတိုင်းနိုင်ငံ ထဲက ဗက်သလေဟမ်မြို့လေး (Bethlehem ကို ကျမ်းစာထဲမှာတော့ ဗက်လင်မြို့ လို့ မြန်မာပြန်ဆိုပါတယ်) ဟာ ခရစ်ယာန်ဘာသာဝင်တွေအတွက်တော့ မေရှိယ လို့ခေါ်တဲ့ ကယ်တင်ရှင်ဘုရားရှင် မွေးဖွားရာ မြို့လေး ပါ။ ဒါကြောင့်လည်း အိန္ဒိယနိုင်ငံ ကို ဗုဒ္ဓဘာသာဝင်တွေ အလည်အပတ်သွားရောက် ကြသလို ဗက်လင်မြို့၊ ဂျေရုဆလင်မြို့ စတဲ့မြို့တွေရှိရာ ပါလက်စတိုင်းနိုင်ငံ နဲ့ အစ္စရေးနိုင်ငံတွေ ကို ခရစ်ယာန်ဘာသာဝင်တွေ ကြိုးစားလည်ပတ်ကြပါတယ်။

ယုံကြည်သက်ဝင်မှုတွေအမျိုးမျိုးရှိနေတဲ့ ကျွန်တော်တို့ ကမ္ဘာကြီးမှာ ခရစ်ယာန်ဘာသာ ဟာလည်း ဘာသာကြီး (၄) ခု စာရင်းဝင်ပါ။ ခရစ္စမတ်ကာလဟာ ခရစ်ယာန်ဘာသာဝင်တို့အတွက် အထွတ်အမြတ် ထားရာနေ့လည်း ဖြစ်ပါတယ်။ မိမိတို့ကို ကမ္ဘာဦး အာဒံ ဧဝ တို့ ပြစ်မှားမှုကြောင့် စတည်လာခဲ့တဲ့ ဇာတိပကတိ အပြစ်မှ ရွေးနှုတ်တော်မူသော ကယ်တင်ပိုင်ရှင် ခရစ်တော်ယေရှု၏ ဖွားမြင်ခြင်းကို အောက်မေ့သတိရတဲ့အနေနဲ့ ပွဲတော်တွေ ကျင်းပကြပါတယ်။ ကျင်းပရာမှာ မွေးနေ့တော်နှင့်ဆိုင်သော ဓမ္မတေးသီချင်းတွေ သီဆိုတာ၊ ဝတ်ပြုကိုးကွယ်တာ၊ နိပတ်တော် ပြသတာ၊ ကျွေးမွေးဧည့်ခံဝတ်ပြုတာ၊ မေတ္တာနှင့် လက်ဆောင်ပေးတာတွေ ပြုကြပါတယ်။ ရပ်နီး ရပ်ဝေး မိတ်တွေသင်္ဂဟတို့ထံ ခရစ်စမတ်ကတ်တွေ ပို့ပြီး ဆုမွန်ကောင်းတောင်းလို့ သတိရနှုတ်ဆက်ကြပါတယ်။ အိမ်တွေမှာလည်း အလှတန်ဆာများဆင်ပြီး မီးများထွန်းညှိ ပျော်ရွှင်ဖွယ်ရာ ဖြစ်အောင် ပြင်ဆင်လေ့ရှိကြပါတယ်။ ဒါကြောင့် ဒီကာလကို ငြိမ်းချမ်းခြင်းတွေနဲ့ မေတ္တာတရားတွေ ဖြစ်ထွန်းစေတဲ့ ကာလလို့ ယုံကြည်သက်ဝင်သူများက ယူဆကြပါတယ်။

သမ္မာကျမ်းစာထဲက ဗက်လင်မြို့ (ဗက်သလေဟမ်) ဆိုတာ

“အို ယုဒပြည် ဗက်လင်မြို့၊ အစိုးရသောယုဒမြို့တွင် သင်သည် မြို့ငယ်မြို့ယုတ် မဟုတ်။ အကြောင်းမူကား၊ ငါ၏ လူစု ဣသရေလအမျိုးကို အုပ်စိုးရသော သခင်သည် သင်၏ အထဲမှာ ပေါ်ထွန်းလတ္တံ။” (မဿဲ ၂း၆) တစ်ချိန်တုန်းက ကာလတစ်ခုမှာ ဗက်လင်မြို့ဟာ သေးသေးနုတ်နုတ် ပဲ ရှိခဲ့ပေမဲ့ ဘုရား ဖွားမြင်တော်မူမယ်ဆိုတာကို ကြိုတင်ပြီး ဓမ္မဟောင်းကာလကတည်းက နိမိတ်ရှိခဲ့တာကို ဓမ္မသစ်ကာလမှာ ဟေရုဒ်ဘုရင် ရဲ့ ပညာရှိအမတ်တွေက လျှောက်ကြတာပါ။ ဗက်လင်မြို့ရဲ့ ဖြစ်ပေါ်တည်ရှိလာတာ ဘယ်လောက် ကာလရှိပြီဆိုတာ ခန့်မှန်းကြည့်လို့ရနိုင်ပါတယ်။ ခရစ်တော် မပေါ်မီ BC 1400 ခန့်ကတည်းက တည်ရှိလာတဲ့ မြို့ လို့ အကြမ်းဖျဉ်းတွက်ဆကြပါတယ်။ ပါလက်စတိုင်းနိုင်ငံရဲ့ West Bank အနောက်ဘက်ကမ်းဗဟို မှာတည်ရှိပြီး ဂျေရုဆလင် ကနေ ၆ မိုင်သာသာ ဝေးတဲ့နေရာမှာ တည်ရှိနေတာဖြစ်ပါတယ်။ အစ္စရေးနိုင်ငံနဲ့ နယ်မြေချင်းအတော်ကပ်လျက်တည်ရှိနေတဲ့ နေရာလည်း ဖြစ်ပါတယ်။ အစ္စရေးနိုင်ငံသားတွေကတော့ ဒီနေရာကို ဝင်ခွင့်ကန့်သတ်ထားတယ်လို့ သိရသလို ပါလက်စတိုင်းနိုင်ငံသားတွေ အစ္စရေးနိုင်ငံကို ဝင်လည်ရင်လည်း အရမ်းစိစစ်တင်းကြပ်ပြီးမှ ဝင်ခွင့်ရတတ်တယ်လို့ ဆိုပါတယ်။ နိုင်ငံခြားခရီးသွားတွေကတော့ လွယ်ကူစွာ သွားလာဝင်ထွက်နိုင်ကြပါတယ်။ ခရစ်ယာန် နဲ့ အစ္စလာမ် ဘာသာဝင်တွေရဲ့ အငြင်းပွားရာ ဒေသမှာ တည်ရှိနေတဲ့တိုင် ဗက်လင်မြို့လေးဟာလည်း သူ့သဘောနဲ့သူ တည်ငြိမ်အေးချမ်းစွာ ခရစ္စမတ်ကာလပေါင်းများစွာ ကို ဖြတ်သန်းနေဆဲဖြစ်ပါတယ်။ အရင်တုန်းကတော့ ခုလို ခရစ္စမတ်အချိန်တိုင်းမှာ ဗက်လင်မြို့ဟာ ခရီးသွားတွေနဲ့ အတော်စည်ကားသက်ဝင်နေတတ်တဲ့ မြို့လေး ဖြစ်ပါတယ်။ ဒီနေရာကို သွားလာဖို့ လုံခြုံရဲ့လားဆိုပြီး အမြဲတွေးဆမိတတ်ကြတယ်။ ကျွန်တော့်အတွက်တော့ လုံခြုံမှုရှိတယ် ခံစားရတယ်။ ပဋိပက္ခအခြေအနေတွေ ဗက်လင်မြို့မှာတော့ ကျွန်တော် သွားတဲ့အချိန် မတွေ့ရသလို၊ ခရီးသွားအားလုံးဟာ ပျော်ရွှင်စွာနဲ့ပဲ ဆုတောင်းဝတ်ပြုနေကြ၊ သွားလာလည်ပတ်နေကြတာပါပဲ။ ဒါပေမဲ့လည်း သက်ဆိုင်ရာ ခရီးသွားလုပ်ငန်းတွေရဲ့ လမ်းညွှန်မှုကို ခံယူပြီး သတ်မှတ်ထားတဲ့နေရာတွေကိုပဲ သွားလာတာတော့ ပိုစိတ်ချရပါတယ်။

ဖွားတော်မူရာဒေသမှာ လေ့လာစရာ

ဗက်သလေဟမ်မြို့ ဗက်လင်မြို့ ကို ရောက်တဲ့အခါ ကျမ်းစာထဲက အချက်တွေ မှန်၏၊ မမှန်၏၊ ဆန်းစစ်ရင်း အံ့သြမှုတွေကို ခံစားကြရတယ်လို့ ခရီးသွားဖူးသူအများစုက ပြောဆိုကြပါတယ်။ တခြားဘာသာဝင်တွေအနေနဲ့လည်း လူမှုစရိုက်၊ ဘာသာရေးအယူအဆ၊ နယ်မြေအခြေအနေ နဲ့ ဘာသာတစ်ခုရဲ့ စတင်ဖြစ်တည်လာရာ သမိုင်းအထောက်အထားတွေကို လေ့လာနိုင်တာမျိုး ဖြစ်ပါတယ်။ ဂျေရုဆလင် အနေနဲ့ လည်ပတ်စရာ များလွန်းပေမဲ့ ဗက်သလေဟမ်မြို့ သီးသန့်အနေနဲ့တော့ သွားလာစရာ နည်းပါးပါတယ်။

Church of the Nativity

ဗက်လင်မြို့ကို ရောက်ပြီဆိုရင် မဖြစ်မနေသွားကြရမယ့်နေရာက Church of Nativity ဘုရားကျောင်းကြီးကိုပါ။ ဒီနေရာမှာ ခရစ်တော်ဘုရားဖွားမြင်ခဲ့တာပါ။ ဆိုတော့ ဒီအကြောင်းက နည်းနည်းတော့ ရှင်းပြရပါတော့မယ်။ အဲ့ဒီခေတ်ကာလတုန်းက ကဲသာဘုရင် သြဂုတ္တု ဟာ တစ်နိုင်ငံလုံး သန်းခေါင်စာရင်း ကောက်နေတဲ့ ကာလဖြစ်ပါတယ်။ အပျိုစင် မာရိ ဆီကို ကောင်းကင်တမန် ဂါဗြေလ ကိုယ်ထင်ရှားပြပြီး ဘုရားရှင်မွေးဖွားဖို့ ပဋိသန္ဓေဆောင်ယူရမဲ့အကြောင်း သတင်းပါး ပါတယ်။ ဒါပေမဲ့ သူနဲ့ လက်ထပ်ရဖို့ ရည်ရွယ်ထားတဲ့ သတို့သားလောင်း ယောသပ် နဲ့ မယှက်တင်ဘဲ ကိုယ်ဝန်ဆောင်ရမှာပါ။ ယောသပ် ကိုလည်း ကောင်းကင်တမန်က ဒီအကြောင်းကို ပြောပြခဲ့လို့၊ ဒီ သန့်ရှင်းသောဝိညာဉ်တော်အတွက် သူတို့ စောင့်ထိန်းခဲ့ကြပါတယ်။ အဲ့ဒီလိုနဲ့ ကိုယ်ဝန်ရင့်လာချိန် သန်းခေါင်စာရင်းကိစ္စအတွက် ယောသပ် ရဲ့ ဇာတိဖြစ်တဲ့ ဗက်လင်မြို့ ကို ခရီးထွက်ခဲ့ကြရတယ်။ အဲ့ဒီမှာ သန်းခေါင်စာရင်းကိစ္စကြောင့် ခရီးသွားတွေ ပြည့်နေရလို့ တည်းခိုဖို့ အဆောင်လည်း မရဖြစ်နေချိန်၊ မွေးချိန်ကလည်း စေ့လို့ နောက်ဆုံးမှာ နွားတင်းကုပ် နေရာလေးမှာပဲ မွေးဖွားခဲ့ရပါတယ်။ “သားဦးကို ဖွားမြင်၍ အဝတ်နှင့်ပတ်ရစ်ပြီးမှ ဧည့်သည်တည်းရာ ဇရပ်၌ သူတို့နေစရာမရှိသောကြောင့်၊ သူငယ်ကို နွားစားခွက်၌ သိပ်ထားလေ၏။” (လုကာ ၂း၇) ဒါပေမဲ့ ဒီ ဘုရားကျောင်းမှာတော့ လိုဏ်ဂူလေးတစ်ခု အတွင်းမှာ တွေ့မြင်ကြရမှာ ဖြစ်ပါတယ်။ ဖြစ်နိုင်ချေက အရင်နေရာလေးကို လိုဏ်ဂူပြုလုပ်ပြီး ဘုရားကျောင်းတည်ဆောက်ခဲ့သလားပေါ့။ ဒီ Church of the Nativity ဟာ ၂၀၁၂ ခုနှစ်မှာ UNESCO ကမ္ဘာ့အမွေအနှစ် စာရင်းဝင်လည်း ဖြစ်ခဲ့ပြီး ဘာသာရေးအငြင်းပွားမှုတွေကြားက ပါလက်စတိုင်းနိုင်ငံ မှာ ပထမဆုံး စာရင်းဝင်ခဲ့ရတဲ့ ဘုရားကျောင်းဖြစ်လို့ ထူးခြားမှု ရှိတယ်လို့ ဆိုနိုင်ပါတယ်။ ဘုရားကျောင်းကြီး ကို ခံတပ်ပုံစံတည်ဆောက်ထားတာက ခရီးသွားတွေကို ထူးထူးခြားခြား ဆွဲဆောင်မှုပေးပါတယ်။ ဒီဘုရားကျောင်းဟာ ကမ္ဘာ့ရှေးအကျဆုံး အဆောက်အဦးတွေထဲက တစ်ခု ဖြစ်ပြီး AD 339 မှာ Helena က တည်ဆောက်ခဲ့တယ်လို့ သိရပါတယ်။ အဲ့ဒီနောက်ပိုင်း ဖျက်ဆီးခံရလိုက်၊ ပြန်တည်ဆောက်လိုက်နဲ့ ရာစုနှစ်ပေါင်းများစွာ ဖျက်ဆီးခံရလိုက် ပြန်တည်ဆောက်လိုက်နဲ့ အကြိမ်ပေါင်းမနည်းဖြစ်ပျက်ခဲ့ရပါတယ်။ Church of the Nativity ဘုရားကျောင်းထဲ ဝင်ပြီဆိုရင် လူတွေက ညာဘက်ကို တိုးဝှေ့သွားနေကြပါလိမ့်မယ်။ အဓိက နေရာဖြစ်တဲ့ Grotto of the Nativity ကို သွားရောက် ကြည့်ရှုဖို့ပဲ ဖြစ်ပါတယ်။ ဒီနေရာကို ဆုတောင်းပြည့်လို့ ဆုတောင်းဝတ်ပြုဖို့ လာကြတယ်လို့ ဆိုပါတယ်။ အဲ့ဒီနေရာမှာပဲ 14 Point Star ဆိုတဲ့ မယ်တော်မာရိ က ခရစ်တော် ကို မွေးဖွားခဲ့တဲ့ နေရာ ကို အမှတ်အသားပြုထားတဲ့နေရာ နဲ့ The Manger ဆိုတဲ့ ခရစ်တော်လေး ကို မွေးပြီးချိန် ထားရှိတဲ့နေရာ တွေပဲ ဖြစ်ပါတယ်။

The Church of the Milk Grotto

ဗက်သလေဟမ်မြို့မှာ မသွားမဖြစ်နေရာတွေထဲ Milk Grotto လိုဏ်ဂူ နေရာလည်း ပါဝင်ပါတယ်။ သမိုင်းကြောင်း ပြန်လှန်ရရင် အရှေ့တိုင်း ပညာရှိတွေက ဘုရားပေါ်မယ်ဆိုတာကို တွက်ချက်မိလို့ ယုဒပြည် ရဲ့ နန်းတော် ကို ရောက်လာခဲ့ပြီး အဲ့ဒီအခါက ဘုရင်ဖြစ်နေတဲ့ ဟေရုဒ်မင်းကြီး ကို လာရောက်မေးမြန်းကြတယ်။ သူတို့ရဲ့ အထင်က ဘုန်းကြီးတဲ့ဘုရင်ဖြစ်လို့ နန်းတော်မှာပဲ မွေးဖွားမယ်လို့ ယူဆခဲ့ကြတယ်။ အဲ့ဒီအချိန်မှာ ဟေရုဒ်မင်းကြီးက သူ့နေရာကို လုမဲ့သူ ရှိနေပြီး သူ့ရဲ့ သားသမီးထဲက မဟုတ်တာမျိုး ဖြစ်လို့ လန့်သွားပြီး ပညာရှိတွေကို တစ်ဘက်လှည့်နဲ့ သူ့ကို နေရာအတိအကျသိရရင် ပြန်လာပြောပေးဖို့ နဲ့ သူလည်း ဖူးတွေ့ချင်တယ်လို့ ပြောခဲ့တယ်။ ပညာရှိတွေကို ကြယ်ကြီးတစ်လုံးက ထွန်းလင်းတောက်ပပြီး လမ်းပြပေးလို့ ခရစ်တော် မွေးဖွားရာနေရာကို ရောက်လာခဲ့ကြတယ်။ ပညာရှိတွေ ဘုရားဖူးပြီးအပြန်မှာ အိပ်မက်အရ အရင်လမ်းက မပြန်ဖို့ ဖြစ်လာတဲ့အတွက် ဟေရုဒ်မင်းကြီးဆီ မဝင်ဖြစ်ခဲ့တော့ဘူး။ အဲ့ဒီမှာ ဟေရုဒ်မင်းကြီးက ပေါက်ကွဲပြီး နှစ်နှစ်အောက် ကလေး ရှိသမျှကို သတ်ပစ်ဖို့ အမိန့်ပေးခဲ့လို အဲ့ဒီခေတ်မှာ ကလေးတော်တော်များများ အသတ်ခံခဲ့ရပေမဲ့ ခရစ်တော်လေးကတော့ ကွယ်ကာမှု ရရှိပြီး လွတ်မြောက်ခဲ့ရတယ်။ ခု လည်ပတ်ရတဲ့ Milk Grotto နေရာမှာ မယ်တော်မာရိ နဲ့ ခရစ်တော်လေး တို့ မိသားစု ပုန်းအောင်းနေရာ တစ်ခု ဖြစ်ပြီ မယ်တော်မာရိ ဟာ နို့ရည် ဖိတ်စင်ခဲ့ရာနေရာဖြစ်ပြီး ကျောက်တုံးပေါ်ကျလို့ အဲ့ဒီကျောက်တုံးဟာ ဆွတ်ဆွတ်ဖြူသွားတယ်လို့ ဆိုပါတယ်။ တချို့ကျတော့လည်း အဲ့ဒီ ကျောက်တုံးဖြူရဲ့ အောက်မှာ ဟေရုဒ်မင်းကြီး အမိန့်နဲ့ အသတ်ခံခဲ့ရတဲ့ ကလေးငယ်အချို့ကို မြှုပ်နှံထားခံရတယ်လို့လည်း ဆိုကြပါတယ်။ ဒီနေရာကို ရောက်လာကြတဲ့သူတိုင်းကတော့ ထူးခြားတဲ့ ငြိမ်သက်အေးချမ်းခြင်းကို ခံစားကြရလို့ ဒီနေရာလေးကို သဘောကျကြတယ်လို့ ဆိုပါတယ်။ ဘာသာမဲ့တွေတောင် သဘောကျကြတဲ့ နေရာတစ်ခုလို့ သိရပါတယ်။

Shepherd’s Fields

ဒီနေရာဟာလည်း ခရစ်ယာန်ဘာသာဝင်တွေအတွက် နောက်ထပ်စိတ်ဝင်စားစရာ အရေးပါတဲ့နေရာ တစ်ခုပါ။ ဒီနေရာမှာ ဘုရားကျောင်းတွေလည်း ရှိပါတယ်။ Greek Orthodox Church နဲ့ Catholic Church တွေပါ။ ကက်သလစ်ဘုရားကျောင်းကတော့ လိုဏ်ဂူပေါ်မှာ တည်ဆောက်ထားတာ ဖြစ်ပါတယ်။ ဗက်လင်မြို့ နဲ့ သိုးတွေ၊ သိုးကျောင်းသားတွေ နဲ့ သိုးစားကျက် တွေဟာ ခွဲခြားမရတဲ့ ကျမ်းစာလာ အတွဲအဖက် တွေပါပဲ။ အဲ့ဒီကာလတွေကနေ ယနေ့အထိပဲ သိုးထိန်း (သိုးကျောင်းသား) တွေ သိုးတွေကို စားကျက်စိမ်းစိမ်းမှာ သိုးကျောင်းကြဆဲပါ။ အဲ့ဒီတုန်းကတော့ သိုးထိန်းတွေဟာ ညဘက်ကြီး တောထဲ သိုးကျောင်းနေတုန်း ကောင်းကင်တမန် တစ်ပါး အရင်ပေါ်လာပြီး “ကြောက်ရွံခြင်းမရှိကြနှင့်။ လူအပေါင်းတို့သည် ဝမ်းမြောက်ဝမ်းသာစရာ သတင်းကို ငါသည် သင်တို့အား ကြားပြောရ၏။ ယနေ့တွင် ဒါဝိဒ်၏မြို့၌ သခင်ခရစ်တော်တည်းဟူသော ကယ်တင်သောအရှင်သည် သင်တို့အဖို့ အလို့ငှာ ဖွားမြင်ခြင်းကို ခံတော်မူပြီ။” (လုကာ ၂း၁၀-၁၁) အစချီ သတင်းကောင်းပြောပြီး ကောင်းကင်မှာ ကောင်းကင်တမန်များစွာ ပေါ်ထွန်းလို့ ကောင်းချီးပေးကြပါတယ်။ ဒီသတင်းကို ကြားပြီး သိုးထိန်းတို့ဟာ ယေရှုခရစ်တော်လေး မွေးဖွားရာ လမ်းညွှန်အတိုင်း သွားပြီးကြည့်ရှုခဲ့ကြပါတယ်။ ဒီမှာပြောထားတဲ့ ဒါဝိဒ်၏မြို့ ဆိုတာ ဗက်လင်မြို့ ကိုပဲ ဆိုလိုတာပါ။ ဒီလိုကြောင့် သိုးထိန်းတွေနဲ့ ပတ်သက်တဲ့အကြောင်းအရာဟာ ဗက်လင်မြို့နဲ့ ဆက်စပ်ပြီး ထင်ရှားပါတယ်။ ဒီနေရာဟာ သိုးထိန်းတွေကို ကောင်းကင်တမန်တွေ သတင်းကောင်း ဆောင်ယူပြောကြားခဲ့တဲ့ နေရာဖြစ်တယ်လို့ ဆိုပါတယ်။ ဒီနေရာဟာ ဗက်လင်မြို့ပြင်မှာ တည်ရှိနေတာလည်း ဖြစ်ပါတယ်။

Rachel’s Tomb

ရာခေလ လို့ ကျမ်းစာထဲမှာ ဖော်ပြတဲ့ Rachel ရဲ့ ဂူဗိမာန် ကို ဒီ ဗက်လင်မြို့မှာ တွေ့ကြရပါမယ်။ “ရာခေလသေ၍၊ ဗက်လင်အမည်ရှိသော ဧဖရတ်မြို့သို့သွားသောလမ်းခရီးတွင်၊ သင်္ဂြိုဟ်ခြင်းကို ခံလေ၏။” (ကမ္ဘာဦး ၃၅း၁၉) ဆိုတဲ့ ကမ္ဘာဦးကျမ်းထဲမှာ ဖော်ပြခံရတဲ့နေရာဟာ ဒီနေ့အထိတိုင် ဗက်လင်မြို့မှာ ရှိနေတာကိုလည်း သွားရောက်လေ့လာနိုင်ပါတယ်။ ဒီနေရာဟာ တကယ့်ကို အစ္စလာမ်ဘာသာ၊ ဂျူးဘာသာ နဲ့ ခရစ်ယာန်ဘာသာဝင်တွေအတွက် ထူးခြားတဲ့ နေရာတစ်ခုလည်း ဖြစ်ပါတယ်။ အတွင်းအမှာ အမျိုးသားနဲ့ အမျိုးသမီး သီးသန့်ဝတ်ပြုနေရာအခန်းလေးတွေ ရှိပြီး ရာခေလ ရဲ့ အုတ်ဂူကိုတော့ အဝတ်နဲ့ ဖုံးအုပ်တန်ဆာဆင်ထားပါတယ်။ အမြဲလိုလို ဝတ်ပြုဆုတောင်းသူတွေနဲ့ ပြည့်နှက်နေတတ်တာပါ။

ဆိတ်ငြိမ်တဲ့ ဗက်သလေဟမ်မြို့လေး

ဗက်သလေဟမ်မြို့လေးဟာ ငြိမ်ငြိမ်သက်သက် ခပ်သေးသေးပဲမို့ သိပ်များများတော့ သွားစရာမရှိပါဘူး။ Manger Square ဝန်းကျင်လျှောက်သွားလို့ ကောင်းသလို၊ ဈေးဝယ်ဖို့ Bethlehem City Center သွားလို့ရတယ်။ အခြား သာသနိက အဆောက်အဦးတွေအနေနဲ့ Sanctuary Bethlehem, Cave of St. Jerome, The Church of St. Catherine, Mar Saba Monastery တွေကို သွားလို့ လေ့လာနိုင်ပါသေးတယ်။

အခုလို ခရစ်ယာန်ဘာသာဝင်တွေရဲ့ အထွတ်အမြတ်ထားရာ ခရစ္စမတ်ကာလ ခရစ်တော်မွေးဖွားရာအချိန်မှာ ခရစ်တော်မွေးဖွားခဲ့တဲ့ ဗက်လင်မြို့လေး အကြောင်းကို တင်ဆက်ရတာလည်း စိတ်ထဲ ပျော်ရွှင်ကြည်နူးရပါတယ်။ သွားလည်တုန်းကလည်း ငြိမ်းချမ်းကြည်နူးရခြင်းကို ခံစားခဲ့ရသလို၊ ဘာသာကြီးတစ်ခုရဲ့ စတင်ဖြစ်တည်ရာ နေရာကိုလည်း သဘောတကျ လေ့လာဖြစ်ခဲ့ပါတယ်။ ကျွန်တော့် ရဲ့ သမ္မာကျမ်းစာထဲခရီးသွားခြင်း အစီအစဉ်လေးကို အပိုင်း (၁၈) မှာ ပဲ ရပ်နားခွင့်ပြုပါခင်ဗျ။ အားလုံးအကြံပြုတဲ့အတိုင်း စာအုပ်အဖြစ် ထွက်လာဖို့လည်း ကြိုးစားပါ့မယ်ဗျ။ ထွက်လာခဲ့ရင်တော့ ဒီမှာ မတင်ဖြစ်ခဲ့တဲ့ အကြောင်းအရာတွေပါ ထပ်ပေါင်းဖြည့်ဆွတ်ပြီး ‌ရေးသားထုတ်ဝေသွားပါ့မယ်လို့ ကြိုတင်ပြောပြချင်ပါတယ်။ စီးပွားရေးဆန်တာ မဟုတ်ပေမဲ့ ကျွန်တော်လည်း ဒီကာလ အလုပ်မရှိသလောက်မို့ ဒီစာအုပ်လေး ထုတ်ဝေတဲ့အခါမှာ ကြော်ငြာထည့်သွင်းလိုတဲ့သူတွေ ရှိမယ်ဆိုရင်လည်း ကျေးဇူးပြုပြီး စုံစမ်းမေးမြန်းနိုင်ပါတယ်လို့ ဖိတ်ခေါ်ချင်ပါတယ်ခင်ဗျ။ တစ်နိုင်ငံလုံးက ဘုရားကျောင်းတွေကနေလည်း ရောင်းချဖို့ စဉ်းစားထားလို့ ခရစ်ယာန်ဘာသာဝင်တွေကို ရည်ညွှန်းတဲ့ကြော်ငြာလေးတွေဆို ပိုအဆင်ပြေပါမယ်ခင်ဗျ။ အပိုင်း (၁၈) ခုစလုံး အားပေးခဲ့လို့ ကျေးဇူးအထူးတင်ပါတယ်ခင်ဗျာ။

အားလုံးပဲ ငြိမ်းချမ်းသာယာတဲ့အချိန် ဖြစ်ပါစေလို့ ဆန္ဒပြု မေတ္တာပို့သပါတယ်ခင်ဗျ။ သီဟလုလင် (Thiha, the Traveller)

ယခု ခရီးသွားဆောင်းပါးအား ကျွန်တော်၏ တိုက်ရိုက် ခွင့်ပြုချက်မရှိဘဲ၊ ဤဆောင်းပါးစာ နဲ့ ဓါတ်ပုံများကို မိမိ အကောင့်မှာဖြစ်စေ၊ ပေ့ချ်တစ်ခုခုမှာဖြစ်စေ၊ Website နဲ့ အခြားမီဒီယာတစ်ခုခုမှာဖြစ်စေ ပြန်လည် ကူးယူဖော်ပြခြင်းများ မပြုပါရန် မေတ္တာရပ်ခံပါတယ်။ ပြန်လည် ကူးယူဖော်ပြခြင်းများကိုတော့ လုံးဝ ခွင့်မပြုပါ။ Photo :: Thiha Lu Lin, U Peter Camera :: SONY Alpha 7II with 85mm Lens, Samsung Galaxy Note5 Photos are modified in Lightroom by Thiha Lu Lin.